د ریاست الوزراء سیاسي مرستیال نن ورځ د افغانستان لپاره د ملګرو ملتونو ځانګړې استازې له مرستیال سره ولیدل.
د ریاست الوزراء سیاسي مرستیال نن ورځ د افغانستان لپاره د ملګرو ملتونو ځانګړې استازې له مرستیال سره ولیدل.
5 جنوري 2023
د افغانستان اسلامي امارت د ریاست الوزراء سیاسي مرستیال مولوي عبدالکبیر نن په سپیدار ماڼۍ کې د افغانستان لپاره د ملګرو ملتونو د سرمنشي د ځانګړې استازې له مرستیال ښاغلي مارکوز پوتزل سره ولیدل.
ښاغلي مارکوز پوتزل وویل چې په افغانستان کې د یوناما ماموریت او افغانانو ته د ملګرو ملتونو بشري مرستې دوام لري، هغه وویل یوناما د افغان حکومت او نړیوالې ټولنې تر منځ د پل حیثیت لري او هڅه کوي چې د دواړو تر منځ واټن پای ته ورسوي.
هغه زیاته کړه چې ملګري ملتونه د افغانانو دین او کلتور ته درناوی لري، خو د ښځو د زده کړو او کار په اړه په اوسني وضعیت قانع نه دي او د امارت وروستي فرمانونه به د نړیوالې ټولنې پر کار او مرستو منفي اغېز وکړي.
هغه وویل چې د افغانستان اسلامي امارت باید د ښځو د زده کړو او کار او په دې هېواد کې د ټولشموله حکومت په اړه د نړیوالې ټولنې غوښتنې ومني.
په دې ناسته کې د ریاست الوزراء سیاسي مرستیال مولوی عبدالکبیر د ملګرو ملتونو له بشري مرستو مننه وکړه او د دې مرستو دوام یې وغوښت.
د ریاست الوزرا سیاسي مرستیال وویل چې د افغانستان اسلامي امارت د رسمیت پېژندنې ټول شرایط پوره کړي او ملګري ملتونه باید په دې سازمان کې د افغانستان څوکۍ دوی ته وسپاري.
نوموړي وویل اسلامي امارت د ملګرو ملتونو نقش ته د قدر په سترګه ګوري هغه زیاته کړه چې اسلامي امارت له نړۍ سره نیک تعامل غواړي او یوناما دې ورسره په دې اړه همکاري وکړي.
هغه زیاته کړه چې دافغانستان اسلامي امارت ټولګډونه حکومت ته ژمن دی، په اوسني حکومت کې د هر قوم او هرولایت خلک شته او لاهم هڅه کېږي چې د هرقوم او سیمې متخصص او هیواد ته ژمن خلک په حکومت کې ځای شي.
نوموړي وویل، اسلامي امارت دیني او عصري زده کړه د هر افغان حق بولي او د افغانانو د مذهب او فرهنګ په رڼا کې دښځو دزده کړو او کار لپاره دمناسب چاپېریال په رامنځته کولو بوخت دی او پدې اړه دنړیوالو بې غرضه مرستې هم غواړي.
هغه وویل، دافغانستان اسلامي امارت هیچاته اجازه نه ورکوي چې دافغانستان خاوره دنورو پرضد وکاروي او پدې اړه موجودې بې بنسټه دعوې ردوي.
اړوند موضوعات
د کورنیو چارو سرپرست وزیر نن ورځ د ملګرو ملتونو سرمنشي، د یوناما سیاسي مرستیال او مل پلاوي سره وکتل.
نوموړي زیاته کړه چې دافغانستان اسلامي امارت نه د چا په کورنیو چارو کې لاس وهي اونه بل چاته د دې کار اجازه ورکوي.
Leave a reply
