د ايران او عربستان د بهرنيو چارو وزيران په بغداد کې سره ګوري

ایران او سعودي عربستان هوډ لري چې د لومړي ځل لپاره يې چارواکي په څرګند ډول سره وګوري.

د عراق د بهرنيو چارو وزارت رسنيو ته ويلي چې تمه ده د ايران او سعودي عربستان هېوادونو د بهرنيو چارو وزيران د عراق پلازمېنې بغداد کې سره ليدنه وکړي.

دغه وزارت دا نه دي ويلي چې ياده ناسته به کومه نېټه ترسره شي، خو دا به له اوږده ځنډه وروسته لومړی ځل وي چې د دغو هېوادونو لوړپوړي چارواکي په څرګند او مخامخ سره وګوري.

ایران او سعودي عربستان د سفارتونو پرانیستل اروزوي 

په ورته وخت کې د ایران د بهرنيو چارو وزیر حيسن اميراللهيان يوې ټلويزوني شبکې سره په مرکه کې ويلي چې د سعودي عربستان او ايران ترمنځ د امنيتي خبرو پړاو پايته رسېدلی او تمه ده چې ډېر ژر د دغو هېوادونو ترمنځ سياسي او څرګندې خبرې اترې پيل شي.

د تهران او رياض اړيکې له ډېرې مودې راهيسې ترينګلي دي او دغه ليدنه د اړيکو ښه کېدو لپاره د دواړو هېوادونو لومړی څرګند ګام دی چې پورته کېږي.