د افغانستان د سوک وهنې آزادو سياليو لوبغاړي احمد ولي هوتک خپل روسي سيال ولاديمير اوسيپوف په خپل کور کې په ګونډو کړ.
هوتک په درېيم رونډ کې اوسيپوف ته ماتې ورکړه او په دې سره يې يوه بل بريا په خپل نامه ثبت کړه.
دغه سيالۍ تېره ورځ ناوخته (جمعه، د چنګاښ ۲۴مه) د روسيې په کراسنودار ښار کې د (ای ایم سي فايټ نايټ) په چوکات کې ترسره شوه.
هوتک له سيالۍ وړاندې په خپل ټوېټر ليکلي ؤ، چې لوبې ته په بشپړ ډول چمتو دی او په بې صبرۍ سره يې انتظار کوي.
د يادونې وړ ده چې دا په افغانستان کې له سياسي تحول وروسته د احمد ولي هوتک لومړنۍ سيالۍ وه چې ترسره شوه او په بريا سره يې پايته ورسېده.
ښاغلي هوتک له سيالۍ څخه وروسته رسنيو ته وويل: ما بشپړ تمرينات کړي ؤ او دا مې هيله وه چې ګران هېواد ته وياړ ورپه برخه کړم.
احمد ولي هوتک د افغانستان د سوک وهنې د آزادو سياليو يو له نوموتو لوبغاړو څخه دی چې له دې وړاندې يې هم په بېلابېلو مهمو او نړيوالو سیاليو کې خپلو سيالانو ته ماتې ورکړې ده.
Leave a Reply