د ا.ا.ا د بهرنیو چارو مرستیال وزیر: هېڅوک افغان مېرمنې له خپلو حقونو محرومولی نه شي

د افغانستان د اسلامي امارت د بهرنيو چارو مرستيال وزير شير محمد عباس ستانکزي په خپلو تازه څرګندونو کې يو ځل بيا په ټينګار سره ويلي چې هېڅوک نشي کولی افغان مېرمنې له خپلو حقونو محرومې کړي.

نوموړي زياته کړې چې، د ټولنې د یوې مهمې برخې په توګه دوی ښځې له پامه نه شي غورځولی او حق لري چې د سیاست او اقتصاد په ګډون د ژوند په هره برخه کې فعاله ونډه ولري.

ښاغلي ستانکزي دغه څرګندونې تېره ورځ په کابل کې یوې غونډې ته کړي دي. نوموړي د خبرو پر مهال ویلي ا.ا.ا د ښځو ټولو حقونو ته ژمن دی او هېڅوک د تعلیم په ګډون د دوی هېڅ یو حق نشي ترې اخيستلی.

د يادونې وړ ده چې په افغانستان کې له شپږمو ټولګيو پورته ښځوونځيو ته د افغان نجونو نه تګ اوس يوه جنجالي موضوع ګرځېدلې ده. د نړيوالې ټولنې په شمول، افغان سياسيون، مدني فعالين او د بشري حقونو فعالين ټول په يوه خوله د ا.ا.ا څخه غواړي چې دې موضوع ته د پای ټکی کېږدي.

په ورته وخت کې د طالبانو د مخکينۍ دورې لوړ پوړي چارواکي مولوي عبدالسلام ضعيف له يوې سيمه ييزې رسنۍ د مرکې پرمهال ويلي چې، له شپږمو ټولګيو پورته ښځوونځيو ته د افغان نجونو د تګ موضوع تر ډېره حل شوې او تمه ده چې ډېر ژر دغې ستونزې ته د پای ټکی کېښودل شي.