پروان ولايت کې د سېلابونو راوتلو له امله ۲ کسان مړه شوي

د پروان ولايت څخه ځايي سرچينې وايي چې په دې ولايت کې د سېلابونو راوتلو له کبله دوه کسان مړي شوي او ۱۰ تنه نور لا درکه دي.

د راپورونو له مخې دا سېلابونه د چهارشنبې په ورځ پروان ولايت د شيخ علي ولسوالۍ په درواز سیمه کې راوتلي دي.

د راپورونو پر بنسټ په ‌دې سېلابونو کې څه باندې ۵۰۰ څاروي مړه شوي او نږدې سل جریبه کرنیزه ځمکه یې هم ویجاړه شوې ده.

دغه خبر داسې مهال ورکول کېږي چې تېره ورځ د افغانستان د هوا پېژندنې رياست د پروان په شمول د هېواد په ۱۵ ولايتونو کې د سختو بارانونو او د سېلابونو د راوتلو او همداراز په ځينو ولايتونو کې د ګرد بادونو د رامنځته کېدو په اړه خبرداری ورکړی ؤ.