وزیر خارجه تاجیکستان بر ضرورت مبارزه با تروریسم در افغانستان تاکید کرد

تلویزیون باغی: توماس ویست، نماینده ویژه وزارت خارجه امریکا برای افغانستان که به تاجیکستان سفر کرده است، روز چهارشنبه، ۱ جون، با وزیر خارجه این کشور گفت‌وگو کرد.

براساس خبرنامه وزارت خارجه تاجیکستان، سراج‌الدین مهرالدین، وزیر امور خارجه این کشور در دیدار با توماس ویست بر ضرورت مبارزه با تروریسم بین‌المللی در افغانستان تأکید کرده است.

در این دیدار دو طرف خواستار گسترش همکاری‌ها در زمینه تحکیم امنیت مرزهای افغانستان و تاجیکستان و ارایه کمک‌های بشردوستانه به مردم افغانستان شده‌اند.

گفته می‌شود که نماینده ویژه وزارت خارجه امریکا برای افغانستان با شماری از سیاست‌مداران این کشور که در تاجیکستان به سر می‌برند نیز گفت‌وگو خواهد کرد.

توماس ویست از چندی به این‌سو سفرش را به کشورهای منطقه آغاز کرده است.