راه اندازی ‘عملیات ضد تروریزم’ توسط نظامیان تاجیکستانی در بدخشان

تلویزیون باغی: نظامیان تاجیکستانی “عملیات ضد تروریزم” را در ولایت ناآرام بدخشان آن کشور که هم مرز با افغانستان است، راه اندازی کرده اند.

این عملیات به دنبال چند روز تظاهرات در ولایت بدخشان تاجیکستان راه اندازی می‌شود. معترضان مدعی اند که والی و شاروال بدخشان نتوانسته اند که مرگ یک فعال مدنی را در بازداشت پولیس به درستی پیگرد کنند و از این رو باید استعفا کنند.

وزارت داخلۀ تاجیکستان روز چهارشنبه ۱۸ می (۲۸ ثور) گفت که اعضای “یک گروه جنایتکار” شاهراه منتهی میان تاجیکستان و چین را مسدود کرده اند تا “ثبات اجتماعی سیاسی” را برهم بزنند. به گفتۀ مقام‌های تاجیک، زمانیکه پولیس به خاطر باز کردن شاهراه دست به کار شد، معترضان با پولیس درگیر شدند.

شاهدان عینی به رسانه‌های محلی تاجیکستان گفته اند در جریان برخورد میان پولیس و معترضان، چندین معترض زخمی شده اند. وزارت داخلۀ تاجیکستان روز سه شنبه گزارش داد که در جریان این تظاهرات یک معترض کشته و سه منسوب پولیس زخمی شده است.

وزارت داخلۀ تاجیکستان بدون ارایۀ مدارک و گرفتن نام کدام گروهی مدعی شده است که تظاهرات در ولایت بدخشان آن کشور از سوی “گروه‌های تروریستی بین‌المللی” حمایت می‌شود که به معترضان تاجیک اسلحه و مهمات فراهم کرده و نیز نمایندگان شان را برای “انجام اعمال تروریستی” به ساحه اعزام کرده اند.

اما معترضان می‌گویند که اعتراضات آنان مسالمت‌آمیز و حق مدنی شان است.

رهبران روسیه و تاجکستان درباره اوضاع افغانستان گفتگو کردند