عمران خان: افغانانو د غلامۍ زولنې ماتې کړې

د پاکستان لومړي وزير عمران خان ويلي، طالبانو د غلامۍ زولنې ماتې کړې او خپل هېواد يې د ازادۍ په نعمت ونازاو.

ښاغلي عمران خان دا څرګندونې په اسلام اباد کې د کلتوري امپرالېزم په عنوان يوې غونډې ته د وينا پر مهال کړي دي.

نوموړي دغې ناستې تهد وينا پر مهال پر انګليسي ژبه پر ښوونه هم نيوکې وکړې او دا يې له نوي نسل سره جفا وبلله.

د پاکستان لومړي وزير دا څرکندونې وروسته تر هغه کړي، چې له څو ورځو چټکو پرمختګونو وروسته طالبانو تېره ورځ د پلازمېنې کابل ښار او ولسمشرۍ ماڼۍ ونيوله.

طالبانو د کابل فتحه د ټولو افغانانو تاريخي بريا بللې او ويلي يې دي، چې د روان بحران د پای ته رسولو لپاره له ټولو جهتونو سره خبرو اترو ته تيار دي.

د افغانستان سربېره د اسلامي نړۍ په نورو هېوادونو کې هم په افغانستان کې د طالبانو پر بريا او د امريکايي يرغل د ماتې په اړه ډېرې خوښۍ ښکاره شوي او د طالبانو بريا يې د ټولو مسلمانانو بريا بللې ده.

د پاکستان، سوريې، فلسطين او يو شمېر نورو اسلامي هېوادونو اتباعو د طالبانو په بريا خوښي ښکاره کړې ده.