وزارت خارجه طالبان از درگیری مرزی قرقیزستان و تاجیکستان ابراز تاسف کرد

تلویزیون باغی: وزارت خارجه طالبان می‌گوید، «امارت اسلامی» درگیری میان نیروهای مرزی قرقیزستان و تاجیکستان و تلفات ناشی از آن را «مایه تأسف» می‌داند.

عبدالقهار بلخی؛ سخنگوی این وزارت امروز (دوشنبه، ۱۱ دلو) در توییتی نوشته است که طالبان روابط دوستانه میان تمامی کشورهای منطقه را وابسته به صلح، ثبات و رفاه اقتصادی تمام حوزه‌ها می‌پندارد.

او گفته است: «ما از هردو کشور می‌خواهیم تا به مشکلات پسین، از طریق گفت‌وگو راه حل دریابند.»

نیروهای مرزی قرقیزستان روز پنج‌شنبه درگیر شدند و به سوی یکدیگر آتش گشودند.

به گفته مقامات قرقیزستان، نیروهای مرزی این کشور و تاجیکستان پس از آن‌که یک شهروند تاجیک جاده میان شهرهای «بادکند» و «اسفنه» را بند آورده بود درگیرشدند.

با این وجود، تاجیکستان تاکید دارد که نیروهای نظامی قرقیزستان این جاده را مسدود کرده بودند و باعث آغاز درگیری میان دو مرزبانان کشور شدند.

بنا بر آمار اعلام شده در بیانیه کمیته امنیت ملی تاجیکستان، درگیری اخیر دست‌کم ۲ کشته و ۱۰ زخمی بر جای گذاشته است. شماری از نظامیان قرقیز نیز زخمی شده‌اند.

نیروهای مرزی تاجیکستان و قرقیزستان، دو کشوری که از متحدان منطقه‌ای روسیه هستند، هر از چند گاهی با هم درگیر می‌شوند.

سال گذشته (۲۰۲۱ میلادی) در جریان تبادل آتش میان مرزبانان تاجیکستان و قرقیزستان دست‌کم ۴۹ نفر کشته شدند.