باغی ټی وی رپورټ
د سعودي عربستان او ایران ترمنځ د ډیپلوماتیکو اړیکو د بیا رغولو لپاره پرمختګ شوی دی.
د عربي ميډيا له مخې سعودي عربستان تهران ته د يو تخنيکي پلاوي له لېږلو وروسته اوس ايران هم سعودي عربستان ته د خپل پلاوي د لېږلو پرېکړه کړې چې په پام کې ده تر جمعې پورې سعودي عربستان ته ولاړ شي.
د رسنیو د راپورونو له مخې، سعودي عربستان ته د ایران له لوري د یوه پلاوي د لېږلو موخه د دواړو هېوادونو ترمنځ د ډیپلوماتیکو اړیکو د بیا رغولو لپاره لاره هواره کول دي.
د سیمه ییزو رسنیو له مخې، د ایران د بهرنیو چارو مرستیال وزیر په دولتي تلویزیون کې په یوه بیان کې ویلي، موږ په پام کې لرو چې د جمعې تر ورځې د بهرنیو چارو له وزارت څخه یو پلاوی سعودي عربستان ته واستوو او په دې لړ کې به دوه جلا پلاوي جدې او ریاض ته ولاړ شي.
د يادونې وړ ده، چې سعودي عربستان او ايران تر ۲۰۱۶ کال وروسته د ډيپلوماټيکو اړيکو د بېرته ټينګولو پرېکړه کړې وه، چې وروسته د دواړو هېوادونو د بهرنيو چارو وزيرانو ليدنه کړې وه، چې د ايران ولسمشر هم د پاچا سلمان په استازيتوب سعودي عربستان ته د سفر بلنه منلې وه. .
Leave a Reply