د لاهور هائي کورټ د پاکستان تحریک انصاف مشر عمران خان ته د مازدیګر په پنځو بجو د حاضریدو وروستې موقع ورکړې ده چې د حفاظتي ضمانت د درخواست او د پاور آف اټارني د لاسلیک تر منځ فرق واضح کړي

باغی ټی وی رپورټ
د لاهور هائي کورټ د پاکستان تحریک انصاف مشر عمران خان ته د مازدیګر په پنځو بجو د حاضریدو وروستې موقع ورکړې ده چې د حفاظتي ضمانت د درخواست او د پاور آف اټارني د لاسلیک تر منځ فرق واضح کړي.

د لاهور هائي کورټ عمران خان ته نن ماسپښين دوه بجې د حفاظتي ضمانت درخواست او د پاور آف اټارني دستخط ترمينځ د فرق وضاحت لپاره طلب کړی دی.

د مقدمې اورېدنه دوه بجې پېل شوه نو جسټس طارق سليم شيخ پوښتنه وکړه چې دوه بجې دي، عمران خان چرته دی؟، د عمران خان وکيلانو وويل چې په لاره روان دی، لږ وخت کې به هلته ورسي. یوه امنیتي ستونزه ده.

جسټس طارق سليم شيخ وويل دامنيت ستونزه زما نه حل کيږي، اوريدنه دڅه مودې لپاره ځنډول کيږي، په عدالت کې رش هم کم کړو.

له وقفې وروسته چې کله اوريدنه بيا پيل شوه نو د عمران خان وکيل وويل چې د عمران خان د حفاظتي ضمانت درخواست د هغه په ​​لاسليکونو نه دی جمع شوی.

عدالت ویلي که عمران خان دا درخواست جمع نه کړي نو څنګه به یې بیرته واخلي؟ داسې نه کیږي چې اوریدنه وخت په وخت وځنډول شي. وکيل عمران خان وويل چې تاسو درخواست رد کړئ، په دې اړه عدالت وويل چې اورېدنه به روانه وي، ستاسو رويې بايد بخښنه غوښتې واى، زه به تاسو ته د شوکاز نوټس درکړم، خپل ځواب تيار کړئ.