پاکستان ته د پخواني ولسمشر جنرال (ر) پروېز مشرف د مړي د لېږلو لپاره چمتووالی بشپړ شوی دی

باغی ټی وی رپورټ
پاکستان ته د پخواني ولسمشر جنرال (ر) پروېز مشرف د مړي د لېږلو لپاره چمتووالی بشپړ شوی دی.

د سفارتي چارواکو په وینا د دوبۍ کونسلګرۍ د مړي د انتقال لپاره این او سي جاري کړی او پاسپورټ یې منسوخ کړی دی.

ډیپلوماټیکو چارواکو ویلي چې د پخواني ولسمشر پروېز مشرف جسد به راولپنډۍ ته ولېږدول شي.

د کورنیو سرچینو له مخې د پرویز مشرف جسد به نن سهار یوولس بجې له مکتوم هوايي ډګره روان شي.

ياده دې وي چې پخوانى صدر جنرل (ر) پرويز مشرف په دوبۍ کې مړ شوى دى. نوموړی له ډېرې مودې راهیسې د دوبۍ په امریکايي روغتون کې تر درملنې لاندې و.

پخوانی ولسمشر پروېز مشرف د ۱۹۴۳ کال د اګسټ په ۱۱ مه په ډیلي کې زېږېدلی، د ۷۹ کلونو په عمر مړ شوی دی.

جنرال (ر) پروېز مشرف د ۱۹۹۸ کال د اکتوبر پر اوومه د پوځ د مشر په توګه دنده تر سره کړه، د ۱۹۹۹ کال د اکتوبر پر ۱۲مه د پخواني لومړي وزیر نواز شریف له لرې کولو وروسته د پاکستان د ولسمشر په توګه وټاکل شو. په اپریل 2002 کې ټولپوښتنه.

په ۲۰۰۴ کال کې په اساسي قانون کې د ۱۷م تعدیل له لارې پروېز مشرف د ۵ نورو کلونو لپاره ولسمشر وټاکل شو، پروېز مشرف د ۲۰۰۸ کال د اګست په ۱۸مه استعفا وکړه او له هېواده ووت.