په کابل کې د وزلوبې سيالۍ د سمنګانو لوبډلې په اتلولۍ پاى ته ورسېدې.
21 دسمبر 2022
په کابل کې د وزلوبې څلورم ليګ سيالۍ د سمنگانو ولایت لوبډلې په لومړي مقام ګټلو سره پاى ته ورسېدې.
د دغو سياليو د پای مراسمو کې د رييس الوزرا مرستيال مولوي عبدالسلام حنفي، د المپيک ملي کمېټې او سپورټ عمومي رئيس انجنير نظرمحمد مطمئن، د بدني روزنې او ورزش عمومي ریاست فني او مسلکي مرستيال حافظ احمد جان ځدراڼ، نورو امارتي مسؤلینو، د ولايتونو د ورزش رئیسانو او امرينو، ورزشکارانو او د وزلوبې سلګونو مينه وال ګډون درلود.
د دې ليګ د پاى په مراسمو کې د رئیس الوزرا مرستيال عبدالسلام حنفي خبرې وکړې نوموړي په خپلو خبرو کې وويل: وزلوبه د هېواد او په ځانګړي ډول د شمالي ولایتونو دوديزه لوبه ده.
ښاغلي حنفي زياته کړه چې په وزلوبې کې بايد رقابت د لوبي په ميدان کې وي له لوبغالي د باندي باید ټول چاپندازان په خپلو کې يووالى او اتحاد وساتي.
د وزلوبې څلورم ليګ سياليو پايلوبې ته د “کندز او سمنګان” لوبډلو لار ومونده، چې د سمنگانو ولایت لوبډلې خپل سيال ته په ماتې ورکولو سره د دې ليګ اتلولي خپله کړه.
په دغو سياليو کې د کندز لوبډلې دويم او د بلخ درېيم او نورستان لوبډلې څلورم مقام خپل کړ.
د وزلوبې څلورم ليګ سيالۍ لس ورځې وړاندې د ١٢ ولایتونو ١٢ لوبډلو په ګډون پيل شوې وې.
اړوند موضوعات
په پاى کې د ورزشي مسوولینو او حکومتي چارواکو او د لوبو د ګډونوالو له لوري ګټونکې لوبډلې او غوره ورزشکارانو ته کپونه، مډالونه او نغدې جايزې هم ورکړل شوې.
Leave a Reply