طالبان وايي د داعش د ځپلو په موخه يې عمليات پيل کړي

طالبانو د چهارشنبې په ورځ وويل چې په افغانستان کې يې د داعش ډلې د ځپلو په موخه د طالبانو د ځانګړو ځواکونو يو ماموریت پيل کړی دی.

(2021 /9 / 30 نېټه باغي ټلویزیون)

طالبانو تر دې وړاندې هم داعش جنګیالي وژلي او یا نيولي دي.

د طالبانو یوۀ ویاند بلال کريمي د چهارشنبې په ورځ وويل چې د دوی ځواکونو تر دې مخکې هم د داعش ډلې يو شمیر غړي چې هغه يې «فتنه اچونکي ځواکونه» بولي، وژلې یا يې نيولي دي.

د آلمان خبري آژانس له کابله ليکي، کريمي ادعا وکړه چې په افغانستان کې د داعش ډلې هيڅ ځواکمن فزيکی سنګرونه نه درولودل، خو زیاته يې کړه چې دغه جنګیالي د ځان د پټولو په هڅه کې دي.

طالبانو نه ده په ډاګه کړې چې د دوی د داعش ضد ماموريت به چيرته وي، خو ځینو ځايي رسنیو ويلي دي چې د داعش ضد عملیات په کابل او ننګرهار ولایتونو کې پيل شوي دي.

داعش ډلې په ورستيو ورځو کې د افغانستان په ختيځ په ځانګړې توګه ننګرهار ولایت کې پر طالبانو د يو لړ بریدونو د ترسره کولو ادعاوې کړي دي. دغه ډله له اوږدې مودې راهيسې په یاد ولایت کې حضور لري او هلته يې له طالبانو سره جګړې کړي دي.