د اطلاعات او کلتور وزارت نشراتي معین مهاجر فراهي د معتادینو پنځه زره بستریز مرکز څخه لیدنه وکړه
24 اکتوبر 2022
د اطلاعات او کلتور وزارت په یوه تازه خبرپاڼه کې راغلي چې د دغه وزارت نشراتي معین ښاغلي “مهاجر فراهي” کابل کې د معتادینو پنځه زره بستریز مرکز څخه لیدنه وکړه.
ښاغلي معین خوښي وښوده چې د معتادینو د علاج لپاره په دومره لوړه کچه روغتون د جوړیدو چاري ۹۰سلنه بشپړي شوي دي او زیاته یې کړه، چې د عالیقدر امیرالمومنین په فرمان د کوکنارو کرکېله ممنوع اعلانیدل او د داسي روغتونونو ایجادیدل به په هیواد کې د معتادینو کچه صفر ته را ټیته کړي.
ښاغلی مهاجر فراهي وایي، چې په میاشت کې دننه به په مخدره موادو روږدو کسانو د راټولولو لړۍ پیل شي، چې دلته به یې د تداوۍ ترڅنګ، دیني، فني، حرفوي زده کړو درسونه او بېلابېل مهارتونه ورته ښودل کیږي، نوموړی وایي چې دېته ورته مرکزونه به په ټولو زونونو کې جوړیږي.
هیره دي نه وي چې د اشغال په وخت کې د کوکنارو د مخنیوي او معتادینو د تداوۍ لپاره د سلګونو ملیونونو ډالرو مرستې ځانګړي شوي وې، خو د کمېدا پرځای نور هم اضافه شول، اسلامي امارت دې برخې ته پوره ژمنتیا او امادګي لري.
Leave a Reply