چین د امریکا سره د د دهشت ګردي په اړه د همکارۍ نه کولو اعلان کړې دې

باغي ټي وي رپورټ
چين له امريکا سره د اقليمي بدلون او د تروريزم د مخنيوي په ګډون په څو مسايلو کې د همکارۍ نه کولو اعلان کړی دی.

د چين د بهرنيو چارو وزارت وايي، د امريکا د ولسي جرګې مشرې نانسي پلوسي له سختو اعتراضونو او سخت مخالفتونو سره سره له تايوان څخه ليدنه وکړه او د يو چين له تګلارې يې سرغړونه وکړه.

په اعتراض کې د چين د بهرنيو چارو وزارت د اقليمي بدلون او د تروريزم د مخنيوي په شمول د څو مسايلو په اړه له امريکا سره د همکارۍ د ختمولو او له امريکا سره د پوځي خبرو اترو د لغوه کولو اعلان وکړ.
د دې تر څنګ چین د امریکا د استازو جرګې پر مشرې نانسي پلوسي هم بندیز ولګاوه، په داسې حال کې چې امریکا د چین دا اقدام غیر ذمه وار ګرځولې دې.

د امریکا د ملي امنیت شورا ویاند جان کربي ویلي، چین کولای شي د پوځي تمرینونو او ویناوو په ختمولو سره تاوتریخوالی کم کړي.

جان کربي وویل چین فکر کوي چې مونږ ته سزا راکړي خو په حقیقت کې نړۍ ته سزا ورکوي.

بل خوا سپینې ماڼۍ د چین د سفیر په احضارولو سره احتجاج کړی دی.