رجب طيب اردغان: ترکيې پر دهوک سيمې بريد کې کوم رول نه درلود

د ترکيې ولسمشر رجب طيب اردغان وايي چې ترکيې په هغه بريد کې چې تېره اونۍ د عراق په دهوک سيمه کې وشوه، کوم رول نه درلود.

اردغان ويلي چې دغه بريد د ترهګرو لخوا شوی او ترهګر غواړي چې په دې سره د ترکيې او عراق ترمنځ اړيکې ترينګلې کړي.

د ترکیې ولسمشر له يوې ترکي رسنۍ سره په خبرو کې له عراقه غوښتي چې د وسله والو ډلو د تبليغاتو تر اغېز لاندې رانشي.

د عراق د کردستان چارواکو تېره سه شنبه (د جولای په ۲۰مه) اعلان وکړ چې په دهوک سيمه کې هوايي بريد شوی دی. دغه بريد کې ۹ ملکي وګړي ووژل شول او ۲۳ تنه ټپيان شول.

وروسته له دې بريد څخه ډېری عراقي چارواکو د دغه بريد پړه پر ترکیې واچوله او ويې ويل چې د دې بريد په اړه يې د ملګرو ملتونو په امنيت شورا کې له ترکيه څخه شکايت ثبت کړی دی.