د ميانمار يو شمېر ځواکونه: د پوځ په امر د بشري حقونو په نقض مو لاس پورې کړی

د ميانمار هېواد یو شمېر ځواکونو په خپلو تازه څرګندونو کې ويلي، چې د دغه هېواد د پوځ په امر د بشري حقونو په نقض يې لاس پورې کړی دی.

د ميانمار شپږ تنه سرتېري چې په دې وروستيو کې له خپل هېواده په تېښته بریالي شوي، له بي بي سي سره په يوې مرکه کې يې اعتراف کړی چې د پوځ په امر يې د ملکي وګړو په وژنې، تېري او د کليو په سوځولو لاس پورې کړی دی.

ميانمار کې تېر کال د دغه هېواد پوځ د واک ګدۍ په لاس واخيسته او اوس هڅه لري چې د ملکي وګړو اخ او ډب غلی کړي.

راپورونه وايي، په دغه هېواد کې له کودتا راهیسې پوځ د پراخو لاریونونو د مخنیوي لپاره تاوتریخوالي ته مخه کړې ده، لسګونه کسان یې وژلی او مقابل کې له پراخ نړیوال محکومیت سره مخ دی.