د اوکراين لومړۍ مېرمن له امريکا څخه د وسلو غوښتنه وکړه

د اوکراين لومړۍ مېرمن اولينا زېلېنسکي چې امريکا متحده ايالتونو ته په رسمي سفر تللې ده، تېره ورځ (چهارشنبه، د چنګاښ ۲۹مه) د امريکا په کانګرس کې د وينا پرمهال يې د اوکراين لپاره د وسلو او مهماتو غوښتنه وکړه.

آغلې زېلېنسکي داسې مهال امريکا ته سفر کوي چې لا هم په اوکراين کې د روسي او اوکرايني ځواکونو ترمنځ جګړه روانه ده.

د اوکراين لومړۍ مېرمن د امريکا کانګرس کې د وينا پرمهال د دغه هېواد له چارواکو وغوښتل چې کيف سره پوځي مرستې وکړي، ترڅو جګړه پايته ورسېږي.

اولينا زېلېنسکي وويل: دا ځکه، چې غواړو ټول پلرونه او ميندې وشي کولای خپلو اولادونو ته ووايي چې له سولې او ارامښت سره ويده شي او دا دې لپاره چې بله ورځ هوايي بريد نه وي. آيا دا لويه غوښتنه ده؟

اولينا په خپلو خبرو کې د روسي ځواکونو له لوري د اوکرايني ماشومانو د وژنې او ټپي کېدو کيسې د امريکا د کانګرس غړو ته واورولې او په مستقيمه توګه يې وويل چې زه د وسلو د ترلاسه کولو غوښتونکې يم.

د اوکراين لومړۍ مېرمن زياته کړه، زه ځکه د دغو وسلو غوښتنه کوم، ترڅو د خپلو ګډو ارزښتونو يعنې بشري حيات لپاره مبارزه وکړو.

اولينا امريکا ته په خپلو سفر کې د دغه هېواد د بهرنيو چارو وزير انتوني بلېنکن او د امريکا لومړۍ مېرمن په شمول يو شمېر نورو چارواکو سره ليدلي دي.