د CIA مشر: هېڅ داسې نښې نشته چې پوتين دې ناروغ وي

د امريکا متحده ايالتونو د مرکزي اطلاعاتو سازمان مشر ويليم برنز په خپلو تازه څرګندونو کې ويلي، هېڅ داسې نښې نشته چې د روسيې مشر دې پر ناروغۍ ککړ وي.

يو شمېر ناتائيد شوي راپورونه او پروپاګندې وايي، چې د روسيې ولسشمر ولاديمير پوتين په سرطان ناروغۍ ککړ دی او دغه ناروغي يې د ودې په حال کې ده.

ويليم برنز په ټوکو سره ويلي چې پوتين له سالم حالت څخه هم ښه ښکاري او زموږ هېڅ داسې اطلاعاتي مالومات نه ښيي چې دغه پروپاګند دې رښتيا وي.

د روسيې ۷۰ کلن مشر په اړه د امريکا د CIA مشر دغه څرګندونې داسې مهال کېږي چې تازه په تازه امريکا ويلي، اوکراين ته نور پوځي وسايل هم ورکوي.

په ورته وخت کې روسيې هم پر اوکراين د تازه بريدونو په اړه خبرداری ورکړی دی.