د اوکراين لومړۍ مېرمن په رسمي سفر امریکا ته تللې

د اوکراين هېواد لومړۍ مېرمن اولينا زېلېنسکي امريکا متحده ايالتونو ته په رسمي سفر تللې ده.

د راپورونو له مخې نوموړې به د دغه سفر په ترڅ کې د امريکا کانګرس ته وينا وکړي او یو شمېر امريکايي لوړپوړو چارواکو سره به ليدنې هم ولري.

مېرمن اولينا تېره ورځ (دوشنبه، د چنګاښ ۲۷مه) د امريکا متحده ايالتونو د بهرنيو چارو وزير انتوني بلېنکن سره هم ليدنه کړې ده.

د راپورونو پر بنسټ تمه ده د اوکراين لومړۍ مېرمن به د امريکا له لومړۍ مېرمن سره په سپينه ماڼۍ کې هم وګوري.

امريکا ته د اوکراين د لومړۍ مېرمن سفر داسې مهال کېږي چې د اوکراين او روسيې ترمنځ جګړه لا هم هغسې توده ده او انګېرل کېږي چې دغه دواړه هېوادونه به د جګړې نوي پړاو ته دننه شي.

تازه په تازه روسي چارواکو ويلي چې دوی په اوکراين کې خپله اصلي جګړه لا نه ده پيل کړې.

څو ورځې وړاندې اوکرايني چارواکو ويلي ؤ، دوی ته امريکا داسې توغندي ورکړي چې کولی شي کریميا پرې په نښه کړي، خو روسيې يې په غبرګون کې وويل که په کريميا سيمې بريد وکړئ، په اوکراين کې به اور بل کړو.