يوسف ځاځی د کرکټ نوی ستوری؛ شپږېزه ليګ کې يې نن ۵ لوبغاړي وسوځول

د افغانستان کرکټ شپږيزه لیګ په نننۍ سيالۍ کې نوي افغان ستوري يوسف ځاځي د خپلې لوبډلې آمو نهنګانو لپاره پنځه وېکټې ترلاسه کړې او په دې سره يې خپله لوبډله بريا ته ورسوله.

يوسف ځاځی چې له کورني کرکټ څخه د افغان روزونکو د شپږيزه کرکټ ليګ سیاليو ته غوره کړی دی، نن يې په خپلې په زړه پورې توپ اچونې سره په څلورو اورونو کې یوازې د ۱۸ منډو په ورکولو سره د مخالفې لوبډلې هندوکش ستوريو پنځه مهمې وېکټې وغورځولې.

د افغان کرکټ بورډ مشرانو ويلي ؤ چې د دې ستر ليګ يوه موخه يې دا هم ده چې له کورنی کرکټ څخه د ملي لوبډلې لپاره نوي او غوره استعدادونه پيدا کړي.

د شپږیزه کرکټ ليګ اتم پړاو سیالۍ تېره ورځ د اته لوبډلو په ګډون سره په کابل کې پيل شوې، چې پنځه بهرنيو لوبغاړو ترڅنګ پکې د افغانستان کورني کرکټ او ملي لوبډلې تقريباً ټول لوبغاړي په خپلو منځونو کوې سيالۍ کوي.