د ترکيې ولسمشر رجب طيب اردوغان نن تهران ته سفر کوي

د ترکيې ولسمشر رجب طيب اردوغان په يو رسمي سفر نن د ايران پلازمېنې تهران ته ځي.

تهران ته د اردوغان دغه سفر داسې مهال ترسره کېږي چې د روسيې ولسمشر ولاديمير پوتين هم ايران ته په رسمي سفر تللی دی.

تمه ده د ايران، ترکيې او روسيې مشران په درې اړخيزه ناسته کې ګډون وکړي او د يو شمېر مهمو او بېلابېلو موضوعاتو په اړه خبرې اترې ولري.

د راپورونو له مخې، د سوريې موضوع، د ايران د اټومي وسلو پروګرام، افغانستان او يو شمېر نور مسائل به د دغې درې اړخيز ناستې د خبرو اصلي محور وي.

تهران ته د روسيې او ترکيې هېوادونو مشرانو دغه سفر داسې وخت کېږي چې تېره اونۍ د امريکا متحده ايالتونو ولسمشر جو بايډن هم آسیايي هېوادونو ته په سفر کې له اسرائيل او سعودي عربستان څخه ليدنې وکړې.

بايدن په دغو هېوادونو کې يو شمېر هوکړه ليکونه هم د دې هېوادونو له مشرانو سره لاسليک کړل.

د امريکا ولسمشر په اسرائيل کې له خپل سیال سره هغه هوکړه ليک هم لاسليک کړ چې له مخې به يې دواړه هېوادونه په ګډه د ايران د اټومي وسلو د پروګرام مخه نيسي.

د ايران د اټومي وسلو پروګرام اوس د سيمې او نړۍ په کچه يو ځل بيا جنجالي شوی دی او وخت نا وخت د ايران، امريکا او اسرائيل مشران په دې اړه خپل غبرګونونه ښکاره کوي.