سوماليا کې يوې الوتکې سقوط کړی، خو چا ته پکې زیان نه دی اوښتی

د سوماليا پلازمېنې موګادیشو په عدن عبدللي هوايي ډګر کې يوې الوتکې د ناستې پرمهال د تخنيکي ستونزو له امله سقوط کړی خو مسافر يې ټول ژوندي پاتې دي.

دغه پېښه تېره ورځ (د چنګاښ ۲۷مه) شوې ده او د الوتکې ۳۶ مسافر او کارکوونکي ټول روغ دي.

د سوماليا رسنۍ وايي د جوبا ايروېز دغه الوتکه د ناستې پرمهال له خپل مسير څخه لرې شوه او ناسته يې په نورمال ډول ترسره نه شوه.

راپورونه وايي دا چې د الوتکې ناسته په نورمال ډول نه وه، اور يې واخيست خو د هوايي ډګر اور وژونکو په بېړني ډول اور مړ کړ او ټول مسافر يې وژغورل.

د راپورونو پر بنسټ ټول مسافر خوندي ځای ته لېږدول شوي او روغتيايي وضعيت يې هم ښه دی، خو الوتکه له منځه تللې ده.