جرمني: د روسيې له ګازو پرته به راتلونکی ژمی زموږ لپاره ستونزمن وي

د جرمني هېواد يوه چارواکي خبرداری ورکړی چې دغه هېواد د روسيې له ګازو پرته نشي کولی د ژمي راتلونکی فصل تېر کړي.

دغه څرګندونې د جرمني هېواد د انرژۍ د برخې يوه چارواکي کلاوس مولر کړي دي. نوموړي ويلي چې په راتلونکي ژمي کې د خپل هېواد لپاره د ګازو زېرمه نلرو او د روسيه له ګازو پرته به دغه ژمی د جرمني لپاره خورا ستونزمن وي.

دغه آلماني چارواکي زياته کړې، که څه هم د هېواد د ګازو زېرمه اوس ۶۵ سلنه ده، خو دا بسنه نه کوي او د ژمي لپاره بايد نور ګاز هم له روسيې وارد کړو.

له کوم وخته چې د اوکراين او روسيې جګړې زور اخيستی، د روسيې اړيکې له نورې نړۍ سره ترينګلې شوي او په دې سره روسيې هم په خپلو صادراتو کې قيودات ډېر کړي دي.

څه موده وړاندې روسيې اعلان وکړ، چې اروپايي هېوادونه دې له دې هېواده د ګازو په شمول د نورو صادراتو د پېر لپاره له روبل څخه کار واخلي، هغه چاره چې د اروپايي ټولنې لپاره د منلو وړ نه وه.

روسيه په نړۍ کې د ګازو يو لوی صادروونکی هېواد دی او د اروپا په ګډون ډېر شمېر هېوادونه ترې ګاز پېري، خو دا چې د اوکراين جګړې له امله نړيوالې ټولنې پر روسيې بنديزونه ډېر کړي، نو په ځواب کې يې روسيې هم خپلو صادراتو باندې قيودات راوستي دي.