ا.ا.ا وايي د ازبکستان پر خاوره د بريدونو په تور يې د داعش غړي نيولي

د افغانستان ا.ا رسنيو ته په استول شوي خبرپاڼه کې ويلي چې د داعش ډلې هغه غړي يې نيولي چې په دې وروستيو کې يې د افغانستان له خاورې پر ګاونډ هېوادونو توغندي ويشتلي ؤ.

په خبرپاڼه کې راغلي، چې ياد کسان يې تېره شپه د کندز ولايت امام صاحب ولسوالۍ په قنجغه سيمه کې نيولي دي.

خبرپاڼه زياتوي، چې د نيول شويو کسانو شمېر ۵ دی او همداراز ۳ نور يې له دوی سره د جګړې پرمهال وژلي دي.

د ا.ا.ا ويلي چې په دې عملياتو کې يې يو شمېر مهمات هم نيولي او نيول شويو کسانو په خپل جرم اعتراف کړی دی.

داعش ډلې لا تر دې دمه په دې اړه څه نه دي ويلي.

په دې وروستيو کې د افغانستان له خاورې څخه پر ګاونډ ازبیکستان او تاجيکستان هېوادونو د توغنديو د ويشتلو په اړه راپورونه خپاره شول، خو په دې دواړو هېوادونو کې يوازې ازبيکستان رسماً دا ومنله چې د افغانستان له خاورې پرې توغنديز بريدونه شوي دي.