د افغانستان ا.ا د بهرنیو چارو وزارت وايي چې مولوي امیرخان متقي د مالیزیا هېواد له لوري د افغانستان لپاره د بهرنیو چارو وزير ځانګړي سلاکار احمد اعظم عبدالرحمن سره لیدلي دي.
دغه وزارت زياتوي، ياده ناسته چې تېره ورځ ترسره شوه، دواړو لوريو پکې په سوداګرۍ، اقتصادي اړیکو، بانکي سکتور، د زدکړو په بهير او دوه اړخيزو همکاریو خبرې اترې کړې دي.
د وزارت په خبرپاڼه کې راغلي، چې ښاغلي متقي له مالیزیايي پلاوي سره په خبرو کې ويلي چې په افغانستان کې پانګونې لپاره ښه فرصت رامنځته شوی او له ياد پلاوي څخه يې د اسلامي بانکدارۍ ترڅنګ له افغانانو سره د تعليمي برسونو او ظرفیت لوړونې په برخه کې يې د همکارۍ غوښتنه کړې ده.
مالیزیايي پلاوي په خپلو خبرو کې ويلي، چې له افغان حکومت او له افغانانو سره به خپلې همکارۍ دوامداره وساتي.
Leave a Reply