د هند ګجرات ايالت کې د سمندر غاړو ته د زمريو تګ خلک ډار کړي

د هند په لويديځه برخه ګجرات ايالت کې د سمندر څنډو ته د زمريو غيرمعمولی تګ خلک ډار کړي دي.

د ګجرات له ځنګلونو څخه د سمندر غاړو ته د دغه زمريو تګ يو غير معمول کار دی.

کارپوهان وايي دا چې د زمريو طبيعي مېشت ځايونه واړه شوي او ګڼه ګوڼه پکې ډېره شوې، نو دغه زمريان اړ دي چې نورو سيمو ته په کډه شي.

راپورونه وايي چې يو وخت د ګجرات په بېلابېلو برخو کې زمريان موجود ؤ، خو د شلمې پېړۍ په لومړيو کې دغه شمېر کم شو چې لامل يې هم وچکالي او ښکار ګڼل کېږي.

که څه هم د هند حکومت د دې ستونزې د حل لپاره ډېرې هڅې وکړې، خو بيا هم د دغو ژويو د طبيعي مېشت ځايونو په کوچني کېدو سره د دې چارې مخنيوی اوس ناشونی برېښي.