د اروپا په ځنګلونو کې اورلګېدنه؛ په سلهاوو تنه تر دې دمه ټپيان شوي

د مياشتو مياشتو وچکالۍ او ګرمې هوا د اروپا ځنګلونه هم له ګواښ سره مخ کړل.

راپورونه وايي چې د هسپانيې، فرانسې او پرتګال په ځنګلونو کې پراخو اورلګېدنو اروپايي مشران او خلک اندېښمن کړي دي.

د پرتګال ډېری ځنګلونه د سختې ګرمۍ له امله د پراخې اورلګېدنې شاهد دي.

په دغه هېواد کې يوازې د څو ساعتونو په ترڅ کې په زرهاوو هکتاره ځنګلونه د اور خوراک شوي.

دغو اورلګېدنو کې تر دې دمه ۱۶۰ کسان ټپيان شوي چې ۷۰ يې اوروژونکي دي.

د پرتګال په شمالي سيمو کې دغو مياشتو کې د ګرمۍ درجه تر ۴۶ رسېدلې، حال دا چې په همدې مياشتو کې په تېرو کلونو کې به يادو سيمو کې د ګرمۍ درجه تر ۲۶ رسېدله.

په ورته وخت کې په فرانسه کې د تېرې جمعې ورځې د باسټيل ورځې د اورلوبې مراسم هم د سختۍ ګرمۍ له امله وځنډول شول.

د کارپوهانو په وينا، د ځمکې په ګرمېدو سره د ګرمۍ څپې شديدې او اوږدې شوې دي.