نس ناستې ناروغۍ په کندهار کې هم د ۴ تنو ژوند واخيست

د نس ناستې يا کولرا ناروغي چې په دې وروستيو کې د افغانستان په بېلابېلو سيمو کې ډېره شوې، په کندهار کې يې هم د ۴ تنو ژوند واخيست.

له کندهاره راغلي راپورونه وايي چې دې ناروغۍ د دې ولايت په شاه ولي کوټ ولسوالۍ کې ۴ تنه وژلي او له ۶۰ پورته نور کسان پرې ککړ شوي دي.

دغه وژونکې ناروغۍ د هلمند په باغران سيمه کې هم خپره شوې او تر دې دمه يې هلته ۱۸ تنه وژلي دي.

په ورته وخت کې په کندهار کې د روغتيا برخې مسؤلين وايي چې د دې ولايت په شاه ولي کوټ کې پر نس ناستې ناروغۍ د اخته کسانو وضعيت ښه نه دی.

دوی له اړوندو مسؤلينو غوښتنه لري چې د دې وژونکې ناروغۍ د مخنيوي لپاره دې ژر تر ژره کوټلي ګامونه پورته کړي.

نس ناستی يا کولرا له اوبو سره تړلې ناروغي ده، چې د ککړو خوړو او اوبو له لارې بدن ته دا باکتریا ننوځي او انسان له يو ډول شديد درد سره مخامخوي.