انټرنېټي هکرانو په ايران کې په يوې فابريکې کې اور بل کړی

د ايراني سرچينو د مالوماتو پر بنسټ د انټرنېټ د هکرانو يوې ډلې چې ځانونه (داړونکې مرغۍ) بولي، د ايران د پولادو په يوې فابريکې اور بل کړی دی.
دوی د خپل د دې کار يوه ويډيو هم رسنيزه کړې ده.

لا تر دې دمه ايراني چارواکو په دې اړه کوم غبرګون نه دی ښودلی.

د دې برخې کارپوهانو په وينا، که دغه بريد رښتيا وي، دا به ترټولو هغه خطرناکه انټرنېټي بريد وي چې د مالي زيانونو سبب ګرځي.

د کارپوهانو له نظره، د دې برید له څرنګوالي ښکاري چې دا د کوم عادي هکر يا هکرانو کار نه دی.

ډېری وخت، کله چې یو دولت غواړي د انټرنېټ له لارې د بل هېواد یا شرکت پر ضد عمل ترسره کړي، نو نښانې د یوه عادي غله یا هکر له کړنو بیخي جلا وي.

بي سي د يو راپور له مخې، ۷۵ سلنه هکرانو د مالي غلا لپاره د خلکو کمپیوټرونو او برېښنالیکونو ته ننوځي. یوازې ۱۵ سلنه هکران داسې دي چې د یو هېواد یا دولت په غوښتنه د یو بل هېواد یا شرکت پر ضد کار کوي.

دغه راپور زياتوي، کارپوهان وایي په بشپړه توګه د هکنګ مخنیوی ناشونی دی. خو شرکتونه باید ورته چمتو وي او کله چې پرې برید کېږي، باید داسې پوهه او وسایل ولري چې ژر تر ژره غبرګون وښیي او له ډېر زیانه ځان وژغوري.