د ايران ولسمشرۍ رياست رسمي پاڼې په يوې خپرې شوې خبرپاڼه کې ويلي چې د ايران ولسمشر ابراهيم رئيسي د پاکستان له لومړي وزير شهباز شریف سره په ټيليفوني خبرو کې د بېلابېلو موضوعاتو په اړه بحثونه کړې دي.
په خبرپانه کې راغلي چې دواړو مشرانو د ايران او پاکستان ترمنځ د اړيکو اړوند د افغانستان د روان وضعيت په اړه هم خبرې اترې کړې دي.
خبرپاڼه کې راغلي چې دواړو مشرانو په دې ټيليفوني اړيکه کې د اختر مبارکۍ وړاندې کولو ترڅنګ د تهران او اسلام آباد ترمنځ په مختلفو برخو او په ځانګړي ډول د انرژۍ او کرنې برخو کې د اړيکو پر پراخوالي ټينګار کړی دی.
د پاکستان لومړي وزير په دې ټيليفوني خبرو کې د افغانستان په تړاو ويلي، موږ غواړو چې افغانستان ته سوله او ثبات بېرته راوګرځي او د وګړو وضعيت هلته ښه شي او پرمختګ وکړي. نوموړي په ټينګار سره ويلي، هلته بايد د دې زمينه برابره شي چې افغان کډوال بېرته خپلې خاورې ته ستانه شي.
Leave a Reply