سريلانکا کې د اپوزيسيون مشر؛ د خپل هېواد ولسمشريزو ټاکنو ته درېږم

وروسته له هغې چې په سريلانکا کې د ژور اقتصادي کړکېچ له امله د دغه هېواد ولسمشر ګوتابایا راجاپاکسا هېواد پرېښود او قهرجن لاريون کوونکي ولسمشرۍ ماڼۍ ته ننوتل، د اپوزيسون مشر ساجيت پرېماداسا ويلي چې هوډ لري د خپل هېواد ولسمشريزو ټاکنو ته ودرېږي.

نوموړي له رسنيو سره په خبرو کې ويلي چې په دې هکله يې د خپلو ټولو متحدينو ژمنه ترلاسه کړې ده.

په سريلانکا کې ژور اقتصادي کړکېچ د دې لامل شو چې عام وګړي واټونو ته راووځي او د حکومتي مشرانو د ګوښه کېدو غوښتنه وکړي.

په دغه هېواد کې روان اقصتادي کړکېچ بې مخينې بلل شوی دی.

د راپورنو له مخې په سريلانکا کې د اسعارو زېرې په تمامېدو دي او له همدې امله خلک د لومړنيو توکو، سوند توکو او درملو د نشتون له امله سختو ستونزو سره لاس او ګرېوان دي.