پوتين: د ليسچانسک ښار له نيولو وروسته بيا هم تهاجمي بريدونو ته دوام ورکوو

د روسيې ولسمشر ولاديمير پوتين د روسيې دفاع وزیر ته امر کړی چې د اوکراين د ليسچانسک ښار له نيولو وروسته بيا هم په دې هېواد کې خپلو تهاجمي بريدونو ته دوام ورکړي.

د روسيې ټلويزون پوتين د خپل دفاع وزير سره د خبرو پرمهال ښودلی، پوتین د دفاع وزير ته ويلي چې د مخکې په څېر به په اوکراين کې خپلې جګړې ته دوام ورکوي.

د ليسچانسک نيول د دې مانا ورکوي چې روسيې په بشپړه توګه د لوهانسک سيمه تر خپلې ولکې لاندې راوستې ده.

پوتين دغه څرګندونې داسې مهال کوي چې د اوکراين او روسيې ترمنځ جګړه لا هم توده ده.
په تازه پېښه کې، يوه ورځ وړاندې د روسيې لخوا پر اوکراين د يو راکېټي بريد په پايله کې ۱۸ تنو خپل ژوند له لاسه ورکړی او ګڼ شمېر ټپيان شوي دي.

د اوکراين ولسمشر ولاديمير زيلنيسکي د دې پېښې په غبرګون کې روسيه د نړۍ ترټولو لويه ترهګريزه ډله ياده کړې ده.

ګڼو هېوادونو هم دغه پېښه يو جنګي جنايت بللی دی.

د يادونې وړ ده چې د اوکراين او روسيې ترمنځ جګړه ۱۳۱ مې ورځې ته دننه شوه.