د ايران (بندر خمير) سیمه نن سهار يوه قوي زلزلې ولرزوله. له دې زلزلې ساعت وروسته يوه بلې زلزلې بيا دغه ساحلي سيمه ولرزوله.
د دغو پرلپسې زلزلو له امله تر دې دمه لږ تر لږه ۵ تنه مړه او شاوخوا ۴۰ تنه ټپيان شوي دي.
لومړۍ زلزله سهار ۲ بجې د (بندر خمير) اړوند د مهران په نامه سيمه کې شوې ده.
د راپورونو پر بنسټ د یادې زلزلې شدت دومره لوړ ؤ چې بندر عباس او متحده عربي اماراتو کې هم حس شوې ده.
د راپورونو له مخې يو ساعت وروسته يعنې سهار ۳ بجې يوې بلې زلزلې بيا هم همدغه سيمه لرزولې ده.
د دغې سيمې ټولې ادارې او موسسې نن شنبه رخصت شوي او د دې ولايت اړوند د بېړنيو حالاتو ډلې اعلان کړی چې سيمې ته يې د ارزونې او مرستې ډلې رسېدلې دي.
يادې ډلې ويلي چې (سايه خوش) هغه کلی دی چې ترټولو ډېر زيان پکې رامنځته شوی دی.
په ايران کې دغه زلزلې داسې مهال کېږي چې دوه اونۍ وړاندې د افغانستان په پکتيکا او خوست ولايتونو کې هم د شديدو زلزلو له امله د یادو سيمو وګړو ته ډېر ځاني او مالي زيانونه واوښتل.
Leave a Reply