سیګار خبر ورکړی چې، افغانستان کې د توکو بیې لوړې شوې او خلک لۀ لوږې سره مخ دي

سیګار خبر ورکړی چې، افغانستان کې د توکو بیې لوړې شوې او خلک لۀ لوږې سره مخ دي

بلخوا په دې وروستیو کې د امریکايي ډالر پر وړاندې د افغانۍ ارزښت بیا په ټيټېدو دی او د کارپوهانو په باور چې د افغانۍ پر وړاندې د ډالر له لوړېدو سره د هېواد په بازارونو کې خوراکي توکي قېمته کېږي.

(2022 / 5 / 15 نېټه باغي ټلویزیون)

بشپړ راپور

د افغانستان د بیارغونې لپاره د امریکا ځانګړې ادارې (سیګار) ویلي، چې په افغانستان کې د خوراکي توکو بیې ورځ تر بلې لوړېږي، چې له امله یې د دغه هېواد تر نیمايي زیات وګړي کافي خواړه نه لري.

سیګار ویلي، چې په افغانستان کې یوازې د اوړو بیه د تېرو پنځو کلونو په نسبت ۸۱ سلنه لوړه شوې او خلک د خوراکي توکو له جدي ستونزو سره مخ شوي.

د دې ادارې د معلوماتو له مخې، چې د ۲۰۲۲م له فبرورۍ راپدېخوا په افغانستان کې د خوراکي توکو بیې څه ناڅه ټیټې وې، خو زیاتوي چې اوس دا بیې ورځ تر بلې بېرته لوړېږي.

همداراز تر دې وړاندې ملګرو ملتونو هم څو ځلې خبرداری ورکړی، چې په افغانستان کې بېوزلي پر زیاتېدو ده او د دغه هېواد تر نیمايي زیات وګړي د خوړو نشتون له جدي ستونزې سره مخ دي.