جوبایډن: هر څۀ غني خراب کړل

 جوبایډن: هر څۀ غني خراب کړل

جوبایډن چې خپل ملت ته یې د افغانستان پۀ اړه وینا کوله چې غني ډاډ ورکړی ؤ چې جنګ به ګټي؛ خو وتښتېدۀ

د کابل پر وخت تېره شپه چې جوبایډن خپل ملت ته د افغانستان پۀ اړه وینا کوله وویل چې دۀ لۀ غني څخه وغوښتل چې طالبانو سره سیاسي توافق وکړي؛ خو پۀ وینا یې غني ورته وویل چې دوی د جنګ ګټونکي دي او نغواړي طالبانو سره د توافق لۀ لارې جوړ جاړی وکړي.

ښاغلي بایډن زیاته کړه، دوی افغانستان ته د ملت جوړونې لپاره نۀ ؤ تللي، بلکې دوی هلته ټاکلي او روښانه اهداف درلودل چې پۀ وینا یې ترلاسه یې کړل او وتوانېدل چې د القاعده ډله وځپي او ډاډ یې تر لاسه کړی چې د القاعده شبکه به لۀ افغانستان څخه بیا پر دوی حمله نکوي.

ښاغلی بایډن پۀ داسې حال کې د افغانستان پۀ اړه خپل ملت ته وینا وکړه چې وړمه ورځ افغانستان پۀ بشپړ ډول د طالبانو لاس ته ولوېد او پخوانی ولسمشر لۀ کابل څخه ووت.