عراقي او ایراني چارواکو لیدنه؛ افغانستان کې یې پۀ ټولشموله حکومت ټینګار کړی

عراقي او ایراني چارواکو لیدنه؛ افغانستان کې یې پۀ ټولشموله حکومت ټینګار کړی

ایراني رسنیو راپور ورکړی چې په دې کتنه کې دواړو لوریو افغانستان کې د وروستیو سیاسي تحولاتو په اړه خبرې کړي او په دغه هېواد کې یې له یوه پراخ‌بنسټه حکومت چې د ټولو قومونو استازي په کې ګډون ولري، پر ملاتړ یې تينګار کړی دی.

(2022 / 4 / 14 نېټه باغي ټلویزیون)

بشپړ راپور

د ایران د بهرنیو چارو وزیر حسین امیر عبداللهیان تهران کې د عراق د بهرنیو چارو له وزیر فواد حسین سره کتلي دي.

د ایران د بهرنیو چارو وزیر په دغه کتنه کې ویلي چې د افغانستان د سرپرست حکومت په رسمیت پېژندل، په دغه هېواد کې د یوه پراخ‌بنسټه حکومت جوړېدو پورې تړلي دي.

نوموړي افغانستان کې د ایران سیاسي استازولیو پر وړاندې د افغانانو اعتراض ته په غبرګون کې ویلي چې د ایران سفارت کې د افغانستان د سیاسي ډلو او خلکو حضور او د ګلانو ډالۍ، د دې ښکارندوینه کوي چې د دواړو هېوادونو دښمنان نشي کولای په دسیسو او توطیو سره د دواړو ګاونډيانو اړیکې خرابې او سرحدي سیمو کې ستونزې راپیدا کړي.

یو‌شمېر افغانانو ایران کې د افغان کډوالو د زورونې په اړه پر ټولنیزو رسنیو خپرو شویو ویډګانو ته په غبرګون کې کابل او هرات کې د ایران سفارت او کونسلګرۍ مخته اعتراض وکړ چې هرات کې یې د ایران کونسلګرۍ دروازې ته اور ورته کړ او ودانۍ ته یې ډبرې ورګوزار کړې.

د ایران د بهرنیو چارو وزارت ویاند سعید خطیب‌زاده دغو اعتراضو ته په غبرګون کې له اسلامي امارت څخه وغوښتل چې د دغه هېواد سفارت او د کونسلګرۍ امنیت خوندي کړي.

د ایران د بهرنیو چارو وزارت هم اعلان وکړ چې کابل او هرات کې د دوی پر سفارت او کونسلګرۍ د برید له امله یې ایران کې د افغانستان سرپرست سفیر احضار کړی دی.

خو د یادو اعتراضونو په بله ورځ یو‌شمېر هېوادوالو کابل کې د ایران سفارت مخته د ګلو ګېډۍ کېښوده او افغانستان کې یې د دغه هېواد له همکاریو مننه وکړه.