اشرف غني: له متخصص بشري ځواک دې؛ د افغانستان د اقتصادي خوځښت لپاره کار واخیستل شي

اشرف غني: له متخصص بشري ځواک دې؛ د افغانستان د اقتصادي خوځښت لپاره کار واخیستل شي

(2022 / 3 / 22 نېټه باغي ټلویزیون)

بشپړ راپور

مخنیکی ولسمشر اشرف غني وايي په افغانستان کې د ډاډ او رښتینې سولې رامنځ ته کولو ته اړتیا ده.

نوموړي د نوي کال په مناسبت په تازه خپاره کړي پیغام کې ویلي چې په افغانستان کې د دایمي سولې او ثبات د راوستو په موخه یوه ملي بحث ته اړتیا ده چې ټول افغانان د یوه با ثباته هېواد د جوړولو لپاره پکې خپل نظریات شریک کړي.

هغه ټینګار کړی چې په افغانستان کې د حکومت ملي او نړیوال مشروعیت ته اړتیا ده او تر هغه چې ملي مشروعیت نه وي رامنځ ته شوی، نړیوال مشروعیت رامنځ ته کېدل ګران کار دی.
مخکیني ولسمشر اشرف غني همدا راز ټینګار کړی چې په افغانستان کې اقتصادي خوځښت ته اړتیا ده او په خبره یې دغه هېواد باید نور د بشردوستانه مرستو مستعمره نه وي، بلکې یو ډاډ دې رامنځ ته کړل شي چې د افغانستان خلک په کار بوخت شي، پانګونه وشي او افغانستان له اوسني ناوړه اقتصادي وضعیت وژغورل شي.

د ده په خبره په افغانستان کې دمګړی د اقتصادي ودې لپاره امنیت رامنځ ته شوی دی، نو اوسني حکومت ته په کار ده چې نووو فکرونو، متخصیصینو او په کار پوه خلکو ته د فعالیت زمینه برابره کړي څو میلیونونه افغانان په کار بوخت شي.
هغه ټینګار کړی چې په افغانستان کې یوه دایمي ډاډ ته اړتیا ده، څو هر افغان ډاډه شي چې په هېواد کې یې شتمني، شخصیت، فکر، پانګونه او هر څه خوندي دي.

اشرف غني زیاته کړې، که نوی حکومت د متخصصو شخصیتونو پلانونو ته ارزښت ورکړي، نو د افغانستان صادرات او تولیدات به په څو کلونو کې څو برابره شي.