طالبانو ملګرو ملتونو ته ډاډ ورکړی چې ښځینه کارکوونکې یې دندې ته تللی شي
ملګري ملتونه وایي چې په افغانستان کې د مرستندویه موسسو د ښځینه او نارینه کارکوونکو ژوند خوندي دی.
(2021 / 9 / 6 نېټه باغي ټلویزیون)
ملګري ملتونه وایي چې په افغانستان کې د مرستندویه موسسو د ښځینه او نارینه کارکوونکو ژوند خوندي دی. د ملګرو ملتونو ویاند په یوه خبري غونډه کې ویلي، چې له طالب چارواکو سره یې خبرې اترې کړې دي او دوی د بشپړ امنیت ډاډ ورکړی دی. سرچینه کاږي د مرستندویه موسسو ټول نارینه او ښځینه کارکوونکي په ډاډه زړه په افغانستان کې فعالیت کولی شي او دوی په بشپړه توګه خوندي دي. سرچینې دغه راز ویلي چې دوی به ډېر ژر په ټول افغانستان کې اړمنو وګړو ته بشري مرستې ورسوي او د بشري ناورین په مخنیوي کې به خپلې هڅې وکړي. تر دې وړاندې هم طالبانو د ملګرو ملتونو په ګډون ټولو مرستندویه موسسو او بهرنیو ديپلوماتیکو بنسټونو ته ډاډ ورکړی چې امنیت یې خوندي دی او له کومې وېرې پرته خپلو بشري فعالیتونو ته ادامه ورکولی شي.
Leave a Reply