باغی ټي وي ربورټ
د جمعیت علمای اسلام مشر مولانا فضل الرحمن افغانستان ته د خپل سفر په ترڅ کې د افغانستان د سیاسي چارو لپاره د لومړي وزیر مرستیال مولوي عبدالکبیر سره لیدلي دي.
مولانا فضل الرحمن له یوه پلاوي سره د افغان حکومت په بلنه کابل ته رسېدلی او هلته یې د افغان حکومت له لوړپوړو چارواکو سره لیدلي دي.
د جمعیت علمای اسلام مشر د افغانستان د وزیراعظم له مرستیال مولانا عبدالکبیر سره وکتل چې پکې د افغانستان د بهرنیو چارو وزیر مولوي امیر متقي، مولوي عبدالطیف منصور او نور کسان هم موجود وو.
په دې غونډه کې په افغانستان کې د پاکستان د ماموریت مشر عبیدالرحمن نظاماني هم ګډون کړی و.
د جمعیت علمای اسلام ف د خبرپاڼې له مخې، مولوي عبدالکبیر کابل ته د مولانا فضل الرحمن او ورسره پلاوي د راتګ هرکلی کړی دی. د افغانستان د بهرنیو چارو وزیر دغه پلاوي ته د افغانستان د اقتصادي، سیاسي او امنیتي وضعیت په اړه معلومات ورکړل او دواړو لورو د دواړو هېوادونو ترمنځ د اړیکو پر بیا رغولو او د ستونزو پر هواري ټینګار وکړ.
په دې کتنه کې مولانا فضل الرحمن په خپلو خبرو کې وويل چې ستونزې بايد د خبرو له لارې هوارې شي، دواړه هېوادونه بايد په بېلابېلو برخو کې پر متقابلو همکاريو خبرې وکړي، هغه له پاکستان څخه د افغان کډوالو د بېرته لېږلو د پرېکړې ملاتړ ونه کړ.
هغه وويل، د پاکستان او افغانستان ګټې مشترکې دي، زموږ موخه دا ده چې له شته اړيکو څخه د دواړو هېوادونو په ګډو ګټو کې کار واخلو.
د افغانستان د صدراعظم مرستیال مولانا عبدالکبیر ویلي، هیله من دی چې کابل ته د ده سفر به د دوه اړخیزو اړیکو په ټینګولو او د ناسم پوهاوي په لرې کولو کې مرسته وکړي.
نوموړي وویل، دوی په سیمه کې سوله او ثبات غواړي، هیچاته به اجازه ورنه کړي، چې د افغانستان خاوره د چا پر ضد وکاروي، اسلامي امارت له پاکستان سره د متقابل احترام پر بنسټ ښې اړیکې غواړي.
مولوي عبدالکبير وويل، د رسنيو د ادعاوو او تبليغاتو پر ځاى غوره ده، چې پر حقايقو خبرې وشي، افغان کډوالو ته بايد لازمې اسانتياوې برابرې شي.
