په رفح ښار کې د مهاجرت پر مهال په بې ګناه فلسطینیانو د بریدونو له امله ګڼ شمېر کسان شهیدان شوي دي.

باغی ټي وي ربورټ
پر غزې د اسرائیلي پوځیانو وحشیانه بمبارۍ په داسې حال کې دوام لري، چې په رفح ښار کې د مهاجرت پر مهال په بې ګناه فلسطینیانو د بریدونو له امله ګڼ شمېر کسان شهیدان شوي دي.

د بې ځايه کېدو پر مهال اسرائيلي توپچيانو هم د بېګناه ماشومانو او ښځو په ګډون ډېر فلسطينيان شهيدان کړل، جسدونه يې پر سړکونو پراته وو، د فلسطينيانو د وروستۍ ساه اخيستلو دردونکې صحنې زړه راښکونکې وې.
صهیونیسټي پوځیانو هم په جبالیه کښې د ملګرو ملتو په پناه ځای باندې حمله وکړه او د غزې له شمال څخه د عسکرو له وتلو وروسته اسرائیلو په غزې بمبارۍ ته شدت ورکړ او د زیات شدت لرونکي بمونه یې وکارول.

په خان یونس سیمه کې په کور د بمبارۍ له امله په تیرو ۲۴ ساعتونو کې له ۱۲۰ زیات فلسطینیان شهیدان شوي، د صلاح د کورنۍ ۱۴ غړي شهیدان شوي او ګڼ نور ټپیان شوي دي، د غزې له مختلفو سیمو بې کوره شویو خلکو د خان یونس په کور کې پناه وړې ده.

د اسرائیلو په بریدونو کې د وژل شویو فلسطینیانو ټولټال شمېر ۲۲ زره ۳۱۳ ته رسېدلی دی.

د بله پلوه اسراییلو د لبنان د سویل په ناقره سیمه کې پر یوې ودانۍ برید کړی چې د اسراییلو په برید کې د حزب الله د لوړپوړي چارواکي حسین یزبیک په ګډون ۹ تنه وژل شوي دي.