د غزې د حالاتو په اړه د اسلامي هېوادونو د همکارۍ سازمان او عربي ټولنې ګډې بېړنۍ غونډې ته د وینا پر مهال سرپرست صدراعظم انوارالحق کاکړ وویل، پر غزې د اسراییلو له بمباریو څخه روغتونونه، ښوونځي او د ملګرو ملتونو دفترونه خوندي نه دي.

باغي ټي وی رپورټ

په غزه کې د فلسطینیانو قتل عام دې سمدستي ودرول شي او د بشري مرستو رسول دې سمدستي یقیني شي.

هغه وویل چې د امنیت شورا دنده لري چې په غزه کې د عام وژنې مخه ونیسي، بې عدالتي او د فلسطیني ملکي وګړو وژنه به د لا زیاتو شخړو لامل شي.

ده ووئيل پاكستان د 1967م كال د سرحدونو سره سم د فلسطين د رياست د جوړېدو ملاتړ كوي، د فلسطين يو داسې رياست چې القدس يې پلازمينه وي، اسرائيل يو جارح او غاصب هېواد دے.

انورالحق کاکړ زیاته کړه، د اسرائیلو جنګي جنایتونه دې د عدالت نړیوالې محکمې ته ورسول شي، د غزې د وضعیت په اړه دې بېړنۍ خبرې اترې پیل شي، د سیاسي حل لپاره دې د فلسطین او اسرائیلو د خبرو لپاره فضا رامنځته شي. د دوو دولتونو د حل لپاره باید د فلسطین او اسراییلو ترمنځ د خبرو اترو یوه لاره پیدا شي.