نگران وزيراعظم انوار الحق کاکړ په غزه کې د روان وحشت په اړه د نړيوالو ځواکونو چوپتيا د شرم وړ بللې او ويلي يې دي چې پاکستان به په نړيواله کچه د فلسطينيانو لپاره خپل غږ پورته کوي.

باغي ټي وی رپورټ

سرپرست صدراعظم انوارالحق کاکړ چې د سعودي عربستان په سفر دی، د فلسطین له ولسمشر محمود عباس سره وکتل.

د فلسطين صدر سره د ليدنې په مهال وزيراعظم انوارالحق کاکړ د غاصب صهيونېسټ ځواکونو لخوا د بې ګناه فلسطينيانو په قتل عام او نسل وژنه د افسوس څرګندونه وکړه.

نگران وزيراعظم ډاډ ورکړ چې پاکستان به د فلسطين د خلکو سفارتي او اخلاقي ملاتړ جاري ساتي.

انورالحق کاکړ وویل چې نړیوال ځواکونه باید په غزه کې د اوربند او د بې ګناه فلسطینیانو د قتل عام په مخنیوي کې رول ولوبوي.

دواړو مشرانو په غزه کې د سمدستي غیر مشروط اوربند او د مرستو رسولو لپاره د دهلیز د جوړولو غوښتنه وکړه.

صدر محمود عباس د پاکستان څخه مننه وکړه چې په سختو وختونو کې یې ملاتړ کړی دی.

ياده دې وي چې نگران وزيراعظم انوار الحق کاکړ په درې ورځني دوره سعودي عرب ته رسيدلى چرته چې به د مقبوضه فلسطين په صورتحال او د اسلامي تعاون تنظيم (او آئي سي) په بيړنۍ غونډه کې ګډون کوي. .

د غزې د خطرناکو حالاتو په اړه د بحث لپاره نن په ریاض کې د عربي هېوادونو سرمشریزه غونډه جوړېږي چې په کې به د غزې په خرابېدونکي وضعیت خبرې وشي.