نړيوال بانکونه دې د افغانستان کنګل شوې پیسې آزادې کړي: د اسلامی امارت غوښتنه

باغي ټي وي رپورټ
په پاک افغان پوله تورخم رسنیو سره خبرو اترو کښې د افغانستان اسلامی امارت د تورخم پولې مسوول محمد عثمان اوویل چې نړيوال بانک او نورې نړيوالې ادارې دې د افغانستان کنګل شوې پیسې آزادې کړي، دوی اوویل چې دا پیسې د افغانستان او د افغانستان اولس او یتیمانو حق دې او باید افغانستان ته ورکړل شي.
محمد عثمان اوویل چې که نړۍ بشري مرستې جاري وساتي نو هغه افغانان چې د افغانستان نه کډه شوي، هغوی به واپس افغانستان ته راشي، هغوی زیاته کړه چې افغان اولس بشري مرستو ته اړتیا لري.
محمد عثمان د پاکستان حکومت او اولس څخه مننه وکړه چې په دې سخت وخت کښې افغان اولس سره مرستې کوي، هغه زیاته کړه چې افغانان په دې وخت کښې حاجت مند دي او بشري مرستو ته اړتیا لري.
د یادونې وړه ده چې د امارت اسلامی مشرانو نن د رسنیو سره خبرې په داسې وخت کښې وکړې چې په تورخم پوله ۲۸ ټنه بشري مرستې چې په کښې د ژوند ضرورت سامان ،د ښځینه جامي،د ضرورت نور سامان او د ماشومانو لپاره مرستې شاملې وي، دا بشري مرسته په درې کانټینرو کښې بار وې او په پوله د اسلامی امارت مشرانو ته حواله کړې شوه چې بیا په اړمنو افغان کورنیو وویشل شي.
دا مرستې د پاک افغان د همکارۍ د ټولنې په مدد او د ماشومانو د ژغورنې نړیوال سازمان په مالي مرسته افغان اولس ته ولیږل شوې.