باغي ټي وي رپورټ
په سعودي عربستان کې د راتلونکي پانګونې د نوښت په اړه د جوړ شوي کنفرانس پر مهال د IM مشرې کریسټالینا جورجیوا وویل، “موږ د جګړې او مرګ ژوبلې په اړه اندېښمن یو، خو د ویجاړۍ او هلته د اقتصادي فعالیتونو د کمېدو په اړه هم اندېښمن یو”.
هغه زیاته کړه چې د دغې جګړې منفي اقتصادي اغیزې په اسرائیلو او د غزې په ګاونډیو هیوادونو لکه مصر، لبنان او مصر کې هم احساسیږي او بې باوري به د سیاحت د عوایدو جریان کم کړي. د پیسو نړیوال صندوق مشر وویل چې “پانګې اچوونکي به سیمې ته له تګ څخه ډډه وکړي پداسې حال کې چې د توکو د لیږد لګښت به هم لوړ شي”.
هغه وويل، چې د دې جګړې له امله به د نړۍ اقتصاد نور هم له بې ثباتۍ سره مخ شي، چې مخکې د انفلاسيون او د سود د نرخونو د زياتوالي له امله له ستونزو سره مخ دى.
تر دې مخکې د اکټوبر په ۲۴مه د نړیوال بانک مشر اجی بنګا هم ورته کنفرانس ته وینا وکړه او خبرداری یې ورکړ چې د اسراییلو او حماس ترمنځ جګړه به د نړۍ اقتصادي پرمختګ ته جدي ګوزار ورکړي.
هغه وويل: “هغه څه چې په دې وروستيو کې په غزه او اسرائيلو کې رامنځ ته شوي، زه فکر کوم چې دا به پر اقتصادي پرمختګ جدي اغېز وکړي.”
هغه زیاته کړه چې “زه فکر کوم چې دا مهال موږ په خورا خطرناک حالت کې یو”.
هغه وویل، جغرافیایي کړکېچ د نړیوال اقتصاد لپاره تر ټولو ستر ګواښ دی.
هغه وویل چې اقتصادي خطرونه په دوامداره توګه مخ په زیاتیدو دي او له پامه غورځول کیدی نشي.
د يادونې وړ ده چې د اکټوبر له اوومې راهيسې د اسراييلو د بريدونو په پايله کې د شهيد شويو فلسطينيانو شمېر له ۵۸۰۰ څخه زيات شوی دی.
د اسرائیلو په بمباریو کې په وژل شویو کسانو کې تر دوه زره زیات ماشومان او ۱۱۰۰ ښځې هم شاملې دي او د زخمیانو شمېر تر ۱۵۰۰۰ اوښتی دی.
Leave a Reply