ايران څه باندې ۴۵۰۰ افغان کډوال له خپلې خاورې ايستلي

د ايراني رسنيو راپورونو له مخې د ايران حکومت تازه په تازه څه باندې ۴۵۰۰ افغان کډوال بېرته افغانستان ته استولي دي.

په دې وروستيو کې له ايران څخه د افغان کډوالو د ويستلو لړۍ چټکه شوې ده.

د ايران حکومت يوه اونۍ مخکې ويلي ؤ، کوم افغان کډوال چې په غير قانوني توګه دې هېواد ته ورغلي او اسناد نلري، بېرته به افغانستان ته ولېږل شي.

د راپورنو پر بنسټ ترکيې هم اعلان کړی، هغه افغان کډوال چې قانوني اسناد نلري بېرته افغانستان ته استوي.

ترکيې ويلي، ۳۶۳ تنه هغه افغان کډوال چې په غير قانوني توګه دې هېواد ته دننه شوي، بېرته به افغانستان ته واستول شي.

ايران او پاکستان هغه دوه هېوادونه دي چې ډېری افغانان پکې د کډوالۍ شپې سبا کوي.

د افغانستان ګاونډ او نورو بهرنيو هېوادونو ته د افغان کډوالو په غير قانوني تګ څه نوې خبره نه ده، دغه چاره له کلونو راهيسې روانه ده.

افغان ځوانان چې د دې کډوالو ډېره برخه جوړوي، په هېواد کې د مناسب کاري چاپېريال د نشتون له امله تل هڅه کوي چې په يو ډول نه يو ډول د افغانستان ګاونډ او يا هم نورو بهرنيو هېوادونو ته ولاړ شي.