د ترکيې پنځمه جوپه بشري مرستې به ډېر ژر افغانستان ورسېږي

راپورنه وايي چې د ترکيې هېواد له لوري د بشري مرستو پنځمه جوپه د ياد هېواد له انقرې څخه د اورګاډي له لارې کابل ته روانه شوې ده.

يادې بشري مرستې د ترکيې هېواد د پېښو سره د مبارزې ادارې (آفاد) په همغږۍ په افغانستان کې د وروستيو زلزله ځپلو سره د لاسنيوي په موخه شوې دي.

يادې بشري مرستې ۴ زره او ۱۷۰ ټنه دي چې په درې اورګاډو کې به افغانستان ته ولېږدول شي.

تمه ده چې دغه مرستې ۱۲ ورځې وروسته کابل ته ورسېږي.

ترکيه يو له هغو هېوادونو ده چې د افغانستان په پکتيکا او خوست کې يې د زلزله ځپلو سره د لاسنيوي په موخه د مرستې ټټر وهلی ؤ.

د راپورنو له مخې د پکتيکا او خوست په هغو سيمو کې چې زلزلې شوې وې، لا هم حالت عادي شوی نه دی او خلک له جدي روغتيايي او اقتصادي ستونزو سره لاس او ګرېوان دي.

د راپورنو پر بنسټ، زلزله ځپلې لا هم د خېمو لاندې شپې سبا کوي او د کورونو د بيا جوړېدو لپاره يې لا کوم عملي ګام نه دی اخيستل شوی.