تايوان: د ترکیې سره مياشت ټولنې سره په همکارۍ د افغانستان زلزله ځپلو سره مرسته کوو

د تايوان د بهرنيو چارو وزارت د يوې خبرپانې په خپرولو سره ويلي دي چې حکومت يې د ترکيې هېواد د سرې مياشتې ټولنې سره په ګډه کار کوي ترڅو د افغانستان زلزله ځپلو او زيانمن شويو وګړو ته ژر تر ژره مرستې ورسوي.

تايوان يو له هغو هېوادونو دی چې د افغانستان په پکتيکا او خوست کې يې د زلزله ځپلو سره د لاسنيوي په موخه د مرستې ټټر وهلی ؤ. دغه هېواد د افغانستان له زلزله ځپلو سره د يو ميليون ډالره مرستې اعلان کړی ؤ.

د راپورنو له مخې د پکتيکا او خوست په هغو سيمو کې چې زلزلې شوې وې، لا هم حالت عادي شوی نه دی او خلک له جدي روغتيايي او اقتصادي ستونزو سره لاس او ګرېوان دي.

د راپورنو پر بنسټ، زلزله ځپلې لا هم د خېمو لاندې شپې سبا کوي او د کورونو د بيا جوړېدو لپاره يې لا کوم عملي ګام نه دی اخيستل شوی.

تېره اونۍ د افغانستان. ا.ا د اقتصادي چارو مرستيال مولوي عبدالغني برادر يادو سيمو ته په سفر کې له زلزله ځپلو سره ژمنه وکړه چې د دوی کورونه به ژر تر ژره ورغول شي.