د هېواد په ۲۸ ولايتونو کې د پوليو ضد واکسين پيل شو
![](https://pashto.baaghitv.com/wp-content/uploads/2022/07/116559797_cbb8b8d2-d54d-4831-9f8d-40d7ec4a4f71.jpg)
د افغانستان ا.ا د عامې روغتيا وزارت وايي چې د هېواد په ۲۸ ولايتونو کې يې د پوليو ضد څلور ورځينی واکسين پيل کړ.
دغه وزرات وايي چې د واکسين ياد کمپاين به د نړيوالو بنسټونو په مرسته تر راتلونکو درې ورځو پورې د هېواد په بېلابېلو ولايتونو کې دوام ولري.
د ياد وزارت د معلوماتو له مخې، په دې کمپاين کې به ۶.۷ ميليونه هغه ماشومان چې عمرونه يې له پنځه کلونو څخه کښته وي، واکسين شي.
پولیو څه شی دی؟
پولیو د پولیوملټیس لنډه بڼه ده او داسې لېږدېدونکې ناروغي ده چې د پولیو ویروس له لارې له یوه بل ته انتقالېږي. د پولیو ملټیس له یوناني ژبې اخیستل شوی دی چې د شمزۍ دننه کوچنیو مغزو ته کارول کېږي. د پولیو درې ډول ویرسونه شته ټول له یوه انسانه بل ته انتقالېږي.
په کوچنیوالي کې د پولیو یو اغېز دادی چې ناروغ فلجوي او هغه ناروغي چې په پایله کې یې رامنځته کېږي، د (ماشومانو ګوزڼ) بلل کېږي.
په څه نا څه ۹۸ پېښو کې پولیو نرۍ تبه رامنځ ته کوي او یا هم انفلوینزا ته ورته ناروغي پیدا کوي. د پولیو هغه بڼه چې د ګوزڼ سبب ګرځي، ویروس پکې د وینې اصلي جریان ته ځان رسوي او پرعصبي حجرو بریدونه کوي. له دوه سلنې لږ کسان چې پولیو ویروس ورته رسېږي، ګوزڼ یې وهي خو ټول عمر معلول وي.